Program - 6. fachowy dźeń 2plus - 16.08.2023
Cyłodnjowske zarjadowanje w Němsko-serbskim šulskim kompleksu Slepo
Naš program
| 09:00 hodź. | přijězd | přijeće moderacija: Beno Bělk |
|
|---|---|---|
| 09.30 hodź. | witanje* Kerstin Wittig | Sakske statne ministerstwo za kultus |
|
| 09.40 hodź. |
předstajenje šulskeho centruma |
|
10.15 – 11.00 hodź. |
přednoški w forumje: Ewaluacija koncepta 2plus wopřija tež zwěsćenje rěčneho stawa we 8. lětniku. Přepytuje so rěčny staw šulerkow a šulerjow 8. lětnikow w serbšćinje a docpěće niwowoweho schodźenka B1 po ZER. W přednošku předstaja so koncept, metodika kaž tež wubrane wuslědki zwěsćenja rěčneho stawa, kotrež je so w pilotowej fazy přewjedło. |
|
| 11.00 – 11.45 hodź. |
Ewaluacija koncepta 2plus w přehledźe Naprašowanja k šulskim ramikowym wuměnjenjam přesadźenja koncepta 2plus tworja stołp koncepta ewaluacije. K tomu naprašuja so šulerki a šulerjo, wučerki a wučerjo, starši, šulske koordinatorki a šulscy koordinatorojo, šulske wjednicy a šulscy nawodźa, fachowe poradźowarki a fachowi poradźowarjo kaž tež sobudźěłaćerki a sobudźěłaćerjo LaSuB. We wobłuku prezentacije předstajitej so struktura a metodika naprašowanjow kaž tež zaměry naprašowanje přewodźacych interviewow. |
|
| 11.45 – 12.30 hodź. | wobjedowa přestawka a natwar wikow móžnosćow | |
| 12.30 – 13.15 hodź. |
Šulerstwo z 18 pochadnymi rěčemi a multiprofesionelny team* |
|
| 13.15 – 14.30 hodź. | Wiki móžnosćow – hlej slědowacy přehlad dotal zapodatych přinoškow | |
| přinošk |
referenća |
|---|---|
|
Tematiske wobłuki w formje modulow Wot šulskeho lěta 2019/2020 so na Serbskim gymnaziju Budyšin we wšelakich lětnikach někotre tematiske wobłuki w formje modulow wuwučuja. Šulerki a šulerjo zaběraja so potajkim přez wjacore dny předmjety zwjazujo z temu, přez čož so lěpši poćah k wšědnemu dnjej twori a diferencowany wid na wučbne wobsahi zmóžnja. Připódla so wšelake metody nałožuja a kompetency na socialnym polu kaž tež při samoorganizowanym wuknjenju so spěchuja. |
Sylwija Šěnowa | Metod Šołta | Serbski gymnazij Budyšin Sylwija Šěnowa je wučerka za biologiju a serbšćinu na Serbskim gymnaziju Budyšin a fachowa poradźowarka serbšćiny Metod Šołta je wučer za biologiju a serbšćinu na Serbskim gymnaziju Budyšin. |
|
Swjedźeń serbskeje rěče w zhromadnym dźěle ze serbskimi towarstwami a institucijemi na zakładnej šuli „Dr. Marja Grólmusec“ Slepo Naša šula přewjeduje tradicionalnje mjeztym 20 lět kóžde druhe lěto swjedźeń serbskeje rěče. Zaměr swjedźenja je, zo wšitke dźěći na tutym wosebitym dnju na mnohotne wašnje serbsku rěč nałožuja a so ze serbskimi spěwami a rejemi zaběraja. Dokelž naše dźěći zwjetša jenož w šuli ze serbskej rěču do kontakta přińdu, zapřijamy bliske serbske towarstwa. Tak chcemy zajim na tutych towarstwach budźić a towarstwa móža so prezentować. |
Sylvia Seitzowa | Zakładna šula „Dr. Marja Grólmusec“ Slepo Sylvia Seitzowa je wučerka a šulska koordinatorka 2plus na Zakładnej šuli „Dr. Marja Grólmusec“ Slepo. |
|
„Přestawki z pohibom“ na Zakładnej šuli „Dr. Marja Grólmusec“ Slepo Naša zakładna šula spěchuje aktiwnje pohibowanje šulerkow a šulerjow. We wobłuku certifikacije jako „Pohibowanska šula“ smy pohibowanske karty za wjace pohibowanja w přestawkach wuwili. Petra Rübesamowa předstaji k tomu material, kotryž bu we wobłuku „Pohibowanskeje zakładneje šule“ wuwity. |
Petra Rübesamowa | Zakładna šula „Dr. Marja Grólmusec“ Slepo Petra Rübesamowa je šulska nawodnica Zakładneje šule „Dr. Marja Grólmusec“ Slepo. |
|
Wobchad z wysokim podźělom šulerkow a šulerjow rěčneju skupinow 2 a 3 – wužiwanje zwonkašulskich wuknjenskich městnow jako žiwe wudospołnjenje k wučbje serbšćiny Wučba serbšćiny nic w rjadowniskim cyłku – to je znamjo jónkrótnosće na Wyšej šuli „Korla Awgust Kocor“ w Kulowje. Wot něhdźe 300 šulerkow a šulerjow wobdźěli so něhdźe 50 (rozdźělene na wšitke lětniki) na wučbje serbšćiny. Tole woznamjenja wužadanje za planowanje, za wučerki a wučerjow w koncepće 2plus ale tež za wobdźělene šulerki a wobdźělenych šulerjow. Motiwacija a kreatiwne ideje su trěbne, zo bychu so šulerki a šulerjo za wučbu w nakromnych hodźinach zahorjeli a hač k zakónčenju wjedli. Namakanje identity a skrućenje identity stej za wobdźělene šulerki a wobdźělenych šulerjow na koncepće 2plus při tym njeparujomnej, wšako móže so kolegialna wuměna na zakładźe wobstejaceho wobłuka jenož zdźěla wotměć. Tak maja so zwonkašulske wuknjenske městna jako žiwe wudospołnjenje serbskeje wučby zrozumić. Wone dadźa šulerki a šulerjow w srjedźišću stać, skrućeja serbske wědomje a maja identitu posrědkujo skutkować. Tež dopóznaće, zo nałožuje so serbska rěč we wšědnym dnju, je za tute šulerstwo husto powučne dopóznaće. Nawuknjenje serbskeje rěče so jako wosobinske wobohaćenje začuwa. |
Susanna Rečelina | Wyša šula „Korla Awgust Kocor“ Kulow Susanna Rečelina skutkuje wot šulskeho lěta 2017/2018 jako wučerka na Wyšej šuli „Korla Awgust Kocor“ w Kulowje. Wona podawa předmjety serbšćina, TC a WTH a je wot šulskeho lěta 2022/2023 tež rjadowniska wučerka 5., přichodnje 6. lětnika. We wobłuku wukubłanja přidružnikow je powołanje přewodźacy studij we WTH absolwowała a wuspěšnje zakónčiła. |
|
Rozprawa wo dźiwadłowym projekće „Mały bojazliwc“ |
Ines Kirstein | Zakładna šula „Handrij Zejler“ Wojerecy Ines Kirstein je wučerka na Zakładnej šuli „Handrij Zejler“ we Wojerecach. |
|
Taskcards za wuměnu přihotow na wučbu Taskcards.de je online-platforma, kotraž móže wučerkam a wučerjam dźěło jara wolóžić, wona zmóžnja zhromadne dźěło na digitalnych pinsćěnach a podpěra wuměnu informacijow w teamach. Hižo dołho přeja sej serbske wučerki a serbscy wučerjo platformu, na kotrejž móža sej přihoty na wučbu wzajomnje k dispoziciji stajeć a dale wobdźěłać. Skupina wučerkow a wučerjow zakładneje šule je nětko iniciatiwu přewzała a hižo někotre materialije na prěnjej pinsćěnje za předmjet serbšćinu přewostajiła. Licenca Rěčneho centruma WITAJ skića wšitkim serbskim wučerkam a wučerjam móžnosć, pinsćěny za dalše předmjety a lětniki wužiwać. Kak móža nowe skupiny při tym hromadźe dźěłać, rozjimuje so na fachowym dnju 2plus. |
Annett Dźědźikowa | dr. Beata Brězanowa | Rěčny centrum WITAJ Annett Dźědźikowa je wot lěta 2006 wotrjadnica lektorata za pedagogisku literaturu w Rěčnym centrumje WITAJ. Praktiske nazhonjenja nazběra jako wučerka w zakładnymaj šulomaj Radwor a Rakecy, po tym jako lektorka za pedagogisku literaturu. Wjele lět skutkuje aktiwnje jako awtorka při wuwiwanju wučbnych materialijow. Dr. Beata Brězanowa je wot lěta 2009 nawodnica Rěčneho centruma WITAJ. Do toho skutkowaše jako swobodna wučerka na fachowych šulach za socialnistwo a wuwučowaše psychologiju, sociologiju, pedagogiku a komunikaciju. W rěčnym centrumje koncentruje so wona na procesy digitalizacije a wědomostny diskurs k wuwučowanju a wuknjenju. |
|
Dźěło na šulskim programje Přesadźenje a akceptanca koncepta 2plus žada sej wot wšitkich wobdźělenych zrozumjenje a fachowsku kompetencu. Přez jasne wupokazanje zaměrow k přesadźenju koncepta a přez transparencu postupowanja móža so kontrowersy wobeńć a dobra baza k rjadowanju serbskeje wučby, dwurěčneje komunikacije a rěčneho dalewuwića móže so wutworić. Jasne pomjenowanje zaměra w šulskim programje zmóžni wotewrjeny diskurs a skutkowne přesadźenje koncepta, přiměrjene na indiwidualne wobstejnosće wotpowědneje serbskeje šule. |
Diana Šołćina | Stefan Wjeńka | Serbska wyša šula „Michał Hórnik“ Worklecy Diana Šołćina je wjednica Serbskeje wyšeje šule „Michał Hórnik“ Worklecy. Stefan Wjeńka je wučer za serbšćinu a sport na Serbskej wyšej šuli „Michał Hórnik“ Worklecy. Wot 2021 je wón koordinator koncepta 2plus na šuli. |
|
Dźěłarnička: Słuchopisak, naš pomocnik „Njemóžemy našemu dźěsću doma při wuknjenju serbšćiny pomhać. Wurjekowanje je jara ćežke. Njeje nichtó w našej swójbje, kiž móže pomhać. Smy přežadani. To njemóžeće nam a našemu dźěsću načinić.“ Kak móže to tola hić, pokazamy na někotrych přikładach z praksy. Analogny digitalny słuchopisak je wšědny wuknjenski pomocnik znutřka a zwonka kubłanišća. Ludwig Eckert a Marcel Rjelka pokazataj w dźěłarničce Slepjansku ideju. |
Ludwig Eckert | Marcel Rjelka | Wyša šula Slepo Ludwig Eckert je wukubłany wučer za gymnazij za předmjetaj serbšćinu a čěšćinu. Wón je na wyšej šuli w Slepom hižo serbsku 2plus-rjadownju wuspěšnje k zakónčenju wjedł. Dale je wón na Slepjanskim kubłanišću koordinator 2plus. Ludwig Eckert wuwučuje w předmjetach serbšćina, stawizny a wot šulskeho lěta 2023/2024 tež w předmjeće čěšćina. Marcel Rjelka je wukubłany wučer wyšeje šule za předmjetaj towaršnowěda a geografija. Tež wón je na wyšej šuli w Slepom hižo serbsku 2plus-rjadownju wuspěšnje k zakónčenju wjedł. Marcel Rjelka wuwučuje w Slepom w horjeka mjenowanymaj předmjetomaj a w předmjetach serbšćina, stawizny a sport. |
|
Dźěłarnička: Regionalne powołanske wiki na Serbskej wyšej šuli Ralbicy Šulske wuwiće kóždeje šulerki a kóždeho šulerja ma zaměr, fundament za dalši žiwjenski puć tworić. Hač wukubłanje, fachowa matura abo pozdźiši studij, puće k powołanju su mnohostronske. Eksistuje šansa na powołanje w bliskosći resp. w dwurěčnej domiznje? Regionalne powołanske wiki Ralbičanskeje šule maja šulerkam a šulerjam runje tute perspektiwy wuwědomić. W dźěłarničce prezentujemoj zajimowanym wobsahi dwurěčnych powołanskich wikow, zaměry a wotběhi. Zdobom předstajimoj zhromadne dźěło z wobdźělenymi a wuslědki ewaluacije. |
Matijas Klimank | Michał Wowčer | Serbska wyša šula Ralbicy Matijas Klimank je wučer na Serbskej wyšej šuli Ralbicy. Wón wuwučuje w předmjetomaj towaršnowěda a zemjepis. Michał Wowčer je wučer a 2plus-koordinator na Serbskej wyšej šuli Ralbicy. Wón wuwučuje w předmjetomaj biologija a serbšćina. |
|
Dźěłarnička: Bilingualny komunikaciski srědk – dźenik na Serbskej wyšej šuli Radwor W dźěłarničce so interny dźenik Serbskeje wyšeje šule Radwor předstaji. Wón słuži jako najwažniši komunikaciski srědk mjez šulu a staršimi. Nimo toho wobsahuje wšitko, štož šulerki a šulerjo za wšědny dźeń trjebaja. |
Sabina Jurencowa | Serbska wyša šula „Dr. Marja Grólmusec“ Radwor Sabina Jurencowa skutkuje wot šulskeho lěta 2017/2018 jako wučerka za serbšćinu, rušćinu a jendźelšćinu na Serbskej wyšej šuli w Radworju. Wona je šulska koordinatorka 2plus a koordinuje nimo toho wuwiće nadawkow za olympiadu serbskeje rěče. |
|
Předstajenje mapy zeznawanskeje dźěłarnički Mapa zeznawanskeje dźěłarnički je myslena za dźěło ze šulskimi nowačkami w prěnimaj tydźenjomaj wučby. W tutym času stwori sej wučerka abo wučer přehlad wo kmanosćach šulerkow a šulerjow. Mapa skići wulki wuběr dźěłowych łopjenow a dźěłowych idejow, kotrež wučerjej wolóža, indiwidualnje a diferencowane ze šulerjom dźěłać. |
Franciska Rachelina | Serbska zakładna šula Ralbicy Franciska Rachelina je wot 1997 w šulskej słužbje a skutkuje jako wučerka zakładneje šule kaž tež koordinatorka 2plus na Serbskej zakładnej šuli Ralbicy. Wona wuwučuje w předmjetach serbšćina, němčina, wěcna wučba, matematika a hudźba. Zhromadnje z dalšej wučerku nawjeduje wona kulturnu skupinu šule. |
|
Nowe medije w zakładnej šuli |
Angela Rynčowa | Hilžbjeta Kandtowa | Serbska zakładna šula „Dr. Marja Grólmusec“ Radwor Angela Rynčowa je nawodnica Serbskeje zakładneje šule Radwor. Wona wuwučuje přewažnje w předmjetomaj jendźelšćina a serbšćina (w rěčnymaj skupinomaj 2 a 3). Hilžbjeta Kandtowa skutkuje jako přidružnica na serbskej zakładnej šuli w Radworju a je přidatnu kwalifikaciju zakónčiła. Wona je tuchwilu rjadowniska wučerka 3. lětnika, kotryž bu serbsce alfabetizowany. Wona wuwučuje přewažnje w předmjetach rěč, matematika, wuměłstwo a hudźba. |
|
Dźěłarnička: Ewaluacija w pěstowarni W dźěłarničce předstaji so ewaluacija w pěstowarni, kotraž so kóžde lěto wot Serbskeje zakładneje šule Worklecy přewjedźe. Ćežišća přednoška su mjez druhim hospitacije w pěstowarni, rěčne přepytowanja a materialije, kiž so při ewaluaciji wužiwaja. Pokaza so nimo toho, kak so wuslědki ewaluacije dokumentuja. Kónc prezentacije wěnuje so tematisce předšuli. |
Borbora Bukowa | Sabina Hejdušcyna | Serbska zakładna šula „Michał Hórnik“ Worklecy Sabina Hejdušcyna je šulska nawodnica Serbskeje zakładneje šule „Michał Hórnik“ Worklecy. Borbora Bukowa je koordinatorka 2plus a rjadowniska wučerka za přichodny 1. lětnik na Serbskej zakładnej šuli Worklecy. |
| Šulske partnerstwo z pólskej šulu | Ludmila Donatowa | Serbska zakładna šula „Jurij Chěžka“ Chrósćicy |
|
Spěchowanje rěče zwonka wučby Předstaja so wšelakore móžnosće, kak so w Kulowje, skerje němskorěčnym měsće, serbska rěč žiwa zdźeržeć a z tym tež spěchować hodźi. Při tym předstaja so wšelake wobłuki zwonka wučby kaž na přikład cyłodnjowske poskitki, kooperacija z hortom/pěstowarnju, zjawnostne dźěło/medije, šulske swjedźenje, zhromadne dźěło z eksternymi institucijemi, kiž tole wuspěšnje podpěruja. |
Edit Mrózec | Zakładna šula „Krabat“ Kulow Edit Mrózec je wučerka na Zakładnej šuli „Krabat“ Kulow a wuwučuje w předmjetach serbšćina/rěč, katolska nabožina a němčina. Wona je druhe lěto w šulskej słužbje a budźe wot šulskeho lěta 2023/24 jako koordinatorka za koncept 2plus na šuli skutkować. |
Kontakt
Fachowy dźeń 2plus je zarjadowanje Sakskeho statneho ministerstwa za kultus a Krajneho zarjada za šulu a kubłanje w kooperaciji z Rěčnym centrumom WITAJ Budyšin.
Při prašenjach wobroćće so prošu na Bosćija Handrika (telefon 03591 621163, e-mail Sebastian.Handrick@lasub.smk.sachsen.de)
Přizjewjenje
Přizjewjenje wučerkow a wučerjow na Fachowy dźeń 2plus lěta 2023 stanje so centralnje přez šulske wjednistwa Bosćijej Handrikej w Krajnym zarjedźe za šulu a kubłanje. Fachowy dźeń so za wučerki a wučerjow jako słužbne zarjadowanje z přewažnje dalekubłacym wobsahom připóznawa. Hačrunjež přewjedźe so za wšě wobdźělnicy a wšitkich wobdźělnikow přijězd a domojjězba z k dispoziciji stajenymi busami, ma so pisomna próstwa wo słužbnu jězbu stajić. We woprawnjenych wuwzaćnych padach móža so jězbne wudawki na zakładźe dowolnosće słužbneje jězby zarunać.
Wobdźělnicy, kotřiž njesteja w žanym słužbnym poměrje ze Swobodnym statom Sakska, přizjewja so prošu přez e-mejlku hač do 14.07.2023 direktnje pola Bosćija Handrika (sebastian.handrick@lsub.smk.sachsen.de). Za nich njeje zarunanje kóštow přez Krajny zarjad za šulu a kubłanje móžne.
Wobrazowe a filmowe nahrawanja
Na zarjadowanju so za zjawnu a wabjensku potrjebu filmuje a fotografuje. Štóž nochce, zo so dokumenty wozjewjeja, na kotrychž je wosobinsce spóznajomny, njech to prošu pola zarjadowarja w předpolu přizjewi pod: Sebastian.Handrick@lasub.smk.sachsen.de abo to na městnje Bosćijej Handrikej wosobinsce zdźěli.
* Tute programowe dypki su němske- abo dwurěčne. Nadrobniše informacije k referentam, přednoškam a dźěłarničkam kaž tež móžne změny programa podadźa so pod www.forum2plus a w dalšich wozjewjenjach k fachowemu dnjej.