Image

9. fachowy dźeń 2plus - 7. nowembra 2026
Cyłodnjowske zarjadowanje we wjacezaměrowej hali „Jednota“ w Chrósćicach

Dotalny fachowy dźeń stanje so z wotewrjenym forumom za naše šule z wučbu po koncepće 2plus. Zhromadnje z Wami chcemy nowe perspektiwy za naše šule jako stajny proces wuwiwać a za móžnosćemi pytać, wšědne dźěło wolóžeć a polěpšeć. 
Forum je městno za najwšelakoriše měnjenja a je žiwy z wuměny a wobdźělenja.

Naš program

pjatk, 06.11.2026

19.00 hodź.

Mjez TikTok a ChatGPT – dźěći a młodostnych w digitalnym wšědnym dnju přewodźeć
Marcel Burghardt, Social web macht Schule

Digitalne medije a kumštna inteligenca postajeja dale a bóle wšědny dźeń dźěći a młodostnych. Starši steja w tym zwisku před wjele prašenjemi: Kak poradźi so zamołwity wobchad ze šmóratkom, socialnymi medijemi, digitalnymi hrami a KI-nałožowanjemi? Kotre móžnosće skića nowe technologije a kotre rizika maja so wobkedźbować? W ramiku přednoška informujemy wo žiwjenskej woprawdźitosći dźěći a młodostnych, podawamy praktiske jednanske doporučenja a pokazamy, kak móže so strowy wobchad z medijemi radźić.

Temy su mjez druhim wužiwanje medijow, chatboty a chatGPT, cybermobbing, cybergrooming, deepfakes, priwatna sfera, młodźinski škit kaž tež strachi wotwisnosće. Nimo toho wobswětlimy šansy a hranicy kumštneje inteligency a dawamy nastorki za wěste a konstruktiwne wobchadźenje z digitalnymi medijemi a KI.

sobota, 07.11.2026

wot 08:30 hodź.

přijězd | přijeće

09.00 hodź.

witanje
Mathias Peter | Krajny zarjad za šulu a kubłanje, nawoda Budyskeje wotnožki

9.30 – 11.30 hodź.

1. faza dźěłarničkow
K přehladej poskitkow dóńdźeće pod tabulku.

11.30 – 12.30 hodź.

připołdniša přestawka z wobjedom

12.30 – 14.30 hodź.

2. faza dźěłarničkow
K přehladej poskitkow dóńdźeće pod tabulku.

14.45 - 15.30 hodź.

Serbske šulske towarstwo z.t.
Serbske šulske towarstwo informuje wo aktualnych wuwićach kaž tež tuchwilnych dźěłowych ćežišćach. 

přehlad dźěłarničkow a přizjewjenje
Image
Fachowy dźeń 2plus wuhotujetej Sakske statne ministerstwo za kultus a Krajny zarjad za šulu a kubłanje, wotnožka Budyšin, w kooperaciji z Rěčnym centrumom WITAJ.