Dźěłarnička tematizuje aktualne wužadanja inkluziwneho wuwučowanja. Srjedźišćo twori prašenje, kak so inkluzija poradźi, na př. při wobchadźe z emocionalno-socialnymi napadnosćemi w zadźerženju šulerkow a šulerjow, při wurunanju njelěpšinow abo při zhromadnym dźěle z internymi a eksternymi partnerkami a partnerami. Wobdźělnicy su přeprošeni swójske temy a nazhonjenja do dźěłarnički zapřijeć. Dźěłać ma so na zakładźe wšelakich padow. Kolegialne padowe poradźowanje so poskića.

koordinatorka za inkluziju
Krajny zarjad za šulu a kubłanje Budyšin

W dźěłarničce předstaja so wubrane wuslědki ewaluacije koncepta „2plus“. Na tutej bazy maja wobdźělnicy w małych skupinach jednotliwe wuslědki ewaluacije diskutować a zhladujo na swójsku šulu móžne rozrisanja za so wotbłyšćowace wužadanja wuwić

Uniwersita Lipsk

Klaca druhdy w teamje? W ramiku tuteje dźěłarnički zhoniće, kotre faktory wuwiće rozmołwy wobliwuja a kak je po wašich předstawach wodźić zamóžeće. Za wšitkich, kotřiž chcedźa swójsku komunikaciju reflektować a polěpšić.

diplom-rěčespytnica

Hdźežkuli smy, nas serbšćina a němčina wobdawa, byrnjež w rozdźělnej měrje. Struktury wšudźe přitomneje němčiny so tež na naše myslenje wuskutkuja, hdyž serbske teksty tworimy. W dźěłarničce chcemy sej rěčne srědki serbšćiny wuwědomić, z kotrymiž docpějemy, zo serbowanje za rěčaceho/pisaceho njeje wobćežne, zo adresat serbski tekst lochce zrozumi a zo mataj wobaj wjeselo a dobre začuće z toho. Zaběrać budźemy so tež z přikładami za praksu Wašeho wšědneho dźěła.

Studio Lucija

Čitanske kompetency našich šulerjow so stajnje bóle rozeznawaja. Kak pak móžemy tomu we wučbje wotpowědować a z pomocu wubranych metodow rozdźělne čitanske kmanosće systematisce spěchować?

nawodnica fachoweho wukubłanja w fachowej didaktice němčina/serbšćina při wučerskim zarjedźe za zakładnu šulu, fachowa poradźowarka za serbšćinu, Krajny zarjad za šulu a kubłanje Drježdźany

LiteraTOUR Sakska spěchuje čitanje a prócuje so wo přistup k literaturje za wšě dźěći. Na dialog wusměrjene metody zmóžnja diferencowane nastajenje čitarja a čitarki, kotrež da hranicy překročić a nowe swěty wotewrić. Předstaja so wubrane móžnosće a teksty za spěchowanje wjesela při čitanju.

LiteraTour Sachsen

Wosebje w Americe a w Jendźelskej, ale tež w zapadnej Němskej so kedźbliwosć dźeń a bóle w šulskej wokolinje zadomi. Wuwili su so wšelakore programy a wučerjo kaž tež šulerjo rozprawjeja wo dobrych wuskutkach: mjenje mylenjow a konfliktow, přijomniša wuknjenska atmosfera, wjace měra a wjesela. By kedźbliwosć tež našim serbskim šulam tyła? Prjedy pak hač móžemy ju jako wučerjo šulerjam zbližić, dyrbimy ju sami za nas wotkryć a ju trenować. W tutej dźěłarničce zeznajomimy so ze wšelakorymi zwučowanjemi kedźbliwosće, kotrež hodźa so w krótkej a dlěšej formje jara jednorje do wšědneho dnja zatwarjeć a tohorunja (pozdźišo) ze šulerjemi w šuli přewjesć.

Dušan Šołta je wukubłany wučer za serbšćinu, chemiju a matematiku a certifikowany MBSR-wučer. Wot lěta  2019 podawa kursy kedźbliwosće za studowacych a přistajenych Drježdźanskeje techniskeje uniwersity, za studentow wučerstwa Lipšćanskeje uniwersity a za wučerjow na šulach we wobłuku ABiK-projekta (https://www.zls.uni-leipzig.de/forschung-und-projekte/abik). Nimo toho dźěła w Ludowym nakładnistwje Domowina we wobłuku marketinga a rozšěrjenja.

MBSR-wučer

Do šulskeje wučby integrowanej yoga a pohib móžetej we wšědnym dnju šule k tomu přinošować, ćělnu strowotu runje tak kaž koncentraciju a kedźbnosć šulerkow a šulerjow spěchować. Runje w času přiběraceho dźěła z wobrazowkami a dołheho sedźenja je wažne, ćěło stajnje zaso k pohibej pohnuwać. Wuspytajće so a přinjesće yoga do Wašeho šulskeho wšědneho dnja!

Zakładna šula Slepo

W ramiku dźěłarnički so wobdźěłanje PDF-kow z pomocu programa Affinity|Designer (za wučerjow darmotne) předstaji a zwučuje. W interneće a wosebje na onlinowej-platformje TaskCards nańdu wučerjo a wučerki dźěłowe łopjena za nimale wšitke předmjety. Hustohdy pak su dźěłowe łopjena jako PDF-ka składowane abo njepředleža w serbščinje. Z Affinity je přełožowanje a wobdźěłanje tajkich dźěłowych łopjenow móžne (download Affinity za wučerjow | registrowanje Canva za šule prošu tu). 

Wuběrk dźěłowych łopjenow staji so w ramiku dźěłarnički k dispoziciji. Rady móžeće pak tež swójske přikłady w digitalnej formje pod nawodom wobdźěłać.

nawodnica Rěčneho centruma WITAJ

studentka wučerstwa na Instituće za Sorabistisku w Lipsku

rěčny marketing a IT-management w Rěcnym centrumje WITAJ

Hladajo na rosćacu prezencu prawicarskoekstremnych prudźenjow na šulach ma pedagogisce reflektowany wobchad z antidemokratiskimi stejišćemi wosebity wuznam. Z pomocu programa „Sylni wučerjo – sylni šulerjo“ móža šule konkretnje na tute wužadanja reagować. W fokusu dźěłarnički steja wosebje doporučenja a skrućenje pedagogiskeje wěstoty při jednanjach wobchadźejo z prawicarskoekstremnymi, antidemokratiskimi abo čłowjeka zacpěwacymi nastajenjemi na šulach.

Krajny zarjad za šulu a kubłanje Radebeul

Amadeo-Antonio-Załožba

Wyša šula Wjazońca

Nowa a moderna literarna družina je so mjeztym tež do serbskorěčneje Łužicy namakała - jedna so wo SPOKEN-WORD. Wona njehodźi so jenož za zwučowanje interpretacije a analyzy stilistiskich srědkow, ale spěchuje najwšelakoriše kompetency młodostnych, na př. rěčne a socialne zamóžnosće. Tuž da so wona do wučby serbšćiny kaž tež do předmjetzwjazowaceje wučby implementować a skići šulerjam móžnosć, so serbšćinje na kreatiwne wašnje bližić. Chcemy w tutej dźěłarničce potencial a metody wužiwanja Spoken-Word w šulskim konteksće předstajić.

studenća Instituta Sorabistiki Lipsčanskeje uniwersity